’ ਭੋਲੇ ‘ ਹੋਏ ਰਾਮਪੁਰਾ ਟਰੱਕ ਯੂਨੀਅਨ ’ਤੇ ਕਾਬਜ, ਭੋਲੇ ਭਾਲੇ ਅਪ੍ਰੇਟਰਾਂ ਦੀਆ ਵੀ ਆਸਾਂ ਜਾਗੀਆ

’ ਭੋਲੇ ‘ ਹੋਏ ਰਾਮਪੁਰਾ ਟਰੱਕ ਯੂਨੀਅਨ ’ਤੇ ਕਾਬਜ, ਭੋਲੇ ਭਾਲੇ ਅਪ੍ਰੇਟਰਾਂ ਦੀਆ ਵੀ ਆਸਾਂ ਜਾਗੀਆ
ਭੋਲਾ ਸਰਮਾ ਚੇਅਰਮੈਨ ਅਤੇ ਸੇਰ ਬਹਾਦਰ ਧਾਲੀਵਾਲ ਭੋਲਾ ਟਰੱਕ ਯੂਨੀਅਨ ਪ੍ਰਧਾਨ ਬਣੇ
ਰਾਮਪੁਰਾ ਫੂਲ (ਬਠਿੰਡਾ) 25 ਅਪ੍ਰੈਲ (ਲੁਭਾਸ਼ ਸਿੰਗਲਾ/ਗੁਰਪ੍ਰੀਤ ਸਿੰਘ) :- ਪੰਜਾਬ ਦੀ ਸਭ ਤੋ ਵੱਡੀ ਟਰੱਕ ਯੂਨੀਅਨ ਰਾਮਪੁਰਾ ਅੰਦਰ ਹਲਕਾ ਵਿਧਾਇਕ ਬਲਕਾਰ ਸਿੱਧੂ ਨੇ ਸਿਆਸੀ ਫੇਰਬਦਲ ਕੀਤਾ ਹੈ। ਅੱਜ ਤੜਕੇ ਦੀ ਪੁਕਾਰ ਤੋ ਪਹਿਲਾ ਵਿਧਾਇਕ ਬਲਕਾਰ ਸਿੱਧੂ ਨੇ ਯੂਨੀਅਨ ਅੰਦਰ ਪੁੱਜ ਕੇ ਪਾਰਟੀ ਆਗੂ ਸ਼ੇਰ ਸਿੰਘ ਧਾਲੀਵਾਲ ਭੋਲਾ ਨੂੰ ਬਤੌਰ ਪ੍ਰਧਾਨ ਐਲਾਣਿਆ ਜਦਕਿ ਉਨ੍ਹਾਂ ਨਾਲ ਯੂਨੀਅਨ ਨੂੰ ਚਲਾਉਣ ਲਈ ਤਜਰਬੇਕਾਰ ਆਗੂ ਮਹਿੰਦਰ ਪਾਲ ਉਰਫ ਭੋਲਾ ਸ਼ਰਮਾਂ ਨੂੰ ਬਤੌਰ ਚੇਅਰਮੈਨ ਥਾਪਿਆ ਗਿਆ। ਵਿਧਾਇਕ ਬਲਕਾਰ ਸਿੱਧੂ ਨੇ ਕਿਹਾ ਕਿ ਸ਼ੇਰ ਸਿੰਘ ਧਾਲੀਵਾਲ ਨੇ ਜਿੱਥੇ ਪਾਰਟੀ ਅੰਦਰ ਇਕ ਚੰਗੇ ਵਰਕਰ ਵਾਂਗ ਕੰਮ ਕੀਤਾ, ਉਥੇ ਹੀ ਇਸ ਦੇ ਗੁਣਾਂ ਦੀ ਪਛਾਣ ਕਰਕੇ ਇਸ ਨੂੰ ਅਪ੍ਰੇਟਰਾਂ ਦੀ ਭਲਾਈ ਵਾਲੀ ਸੰਸਥਾਂ ਟਰੱਕ ਯੂਨੀਅਨ ਰਾਮਪੁਰਾ ਵਿਖੇ ਵੀ ਬਤੌਰ ਪ੍ਰਧਾਨ ਵਜੋ ਸੇਵਾ ਦਾ ਮੌਕਾ ਦਿੱਤਾ ਜਾਂਦਾ ਹੈ ਜਦਕਿ ਇਨ੍ਹਾਂ ਦੇ ਨਾਲ ਬਤੌਰ ਚੇਅਰਮੈਨ ਭੋਲਾ ਸ਼ਰਮਾਂ ਸਾਬਕਾ ਪ੍ਰਧਾਨ ਟਰੱਕ ਯੂਨੀਅਨ ਰਾਮਪੁਰਾ ਨੂੰ ਲਗਾਇਆ ਜਾਂਦਾ ਹੈ ਤਾਂ ਜੋ ਅਪ੍ਰੇਟਰਾਂ ਨੂੰ ਕਿਸੇ ਪ੍ਰਕਾਰ ਦੀ ਕੋਈ ਦਿੱਕਤ ਨਾ ਆਵੈ। ਉਧਰ ਦੋਵੇ ਨਵ ਨਿਯੁਕਤ ਆਗੂਆਂ ਸ਼ੇਰ ਬਹਾਦਰ ਸਿੰਘ ਧਾਲੀਵਾਲ ਅਤੇ ਭੋਲਾ ਸ਼ਰਮਾ ਨੇ ਸਿੱਧ ਪੁਰਸ਼ ਬਾਬਾ ਇੰਦਰ ਦਾਸ ਜੀ ਮਹਾਰਾਜ ਦੇ ਸਰੂਪ ਅੱਗੇ ਨਤਮਸਤਕ ਹੋ ਕੇ ਅਸ਼ੀਰਵਾਦ ਪ੍ਰਾਪਤ ਕੀਤਾ ਅਤੇ ਵੱਡੀ ਗਿਣਤੀ ਵਿਚ ਹਾਜਰ ਟਰੱਕ ਅਪ੍ਰੇਟਰਾਂ ਅਤੇ ਇਸ ਧੰਦੇ ਨਾਲ ਜੁੜੇ ਲੋਕਾਂ ਨੂੰ ਵਿਸ਼ਵਾਸ਼ ਅਤੇ ਭਰੋਸਾ ਦਿਵਾਇਆ ਕਿ ਟਰੱਕ ਅਪ੍ਰੇਟਰਾਂ ਦੀ ਭਲਾਈ ਲਈ ਹਰ ਸੰਭਵ ਯਤਨ ਕੀਤੇ ਜਾਣਗੇ ਜਦਕਿ ਅਪ੍ਰੇਟਰਾਂ ਦਾ ਢੋਅ ਢੁਆਈ ਦੀ ਬਣਦੀ ਪੂਰੀ ਰਾਸ਼ੀ ਦਿੱਤੀ ਜਾਵੇਗੀ। ਉਨ੍ਹਾਂ ਪਾਰਟੀ ਹਾਈਕਮਾਂਡ ਅਤੇ ਵਿਧਾਇਕ ਬਲਕਾਰ ਸਿੱਧੂ ਦਾ ਵੀ ਧੰਨਵਾਦ ਕਰਨ ਦੇ ਨਾਲੋ ਨਾਲ ਸਮੂਹ ਟਰੱਕ ਅਪ੍ਰੇਟਰਾਂ ਦਾ ਵੀ ਧੰਨਵਾਦ ਕੀਤਾ, ਜਿਨ੍ਹਾਂ ਨੇ ਉਨ੍ਹਾਂ ਨੂੰ ਖਿੜੇ ਮੱਥੇ ਸਵੀਕਾਰ ਕਰਨ ਅਤੇ ਸੇਵਾ ਕਰਨ ਦਾ ਮੋਕਾ ਪ੍ਰਦਾਨ ਕੀਤਾ ਹੈ। ਉਧਰ ਵੱਡੀ ਗਿਣਤੀ ਵਿਚ ਹਾਜਰ ਅਪ੍ਰੇਟਰਾਂ ਨੇ ਨਵ ਨਿਯੁਕਤ ਪ੍ਰਧਾਨ ਸ਼ੇਰ ਬਹਾਦਰ ਧਾਲੀਵਾਲ ਅਤੇ ਚੇਅਰਮੈਨ ਭੋਲਾ ਸ਼ਰਮਾਂ ਦਾ ਮੂੰਹ ਮਿੱਠਾ ਕਰਵਾਉਣ ਦੇ ਨਾਲੋ ਨਾਲ ਹਾਰਾਂ ਨਾਲ ਲੱਦ ਕੇ ਸਵਾਗਤ ਕੀਤਾ। ਟਰੱਕ ਅਪ੍ਰੇਟਰ ਅਮਨਦੀਪ ਸਿੰਘ ਖਾਲਸਾ ਰਾਮਪੁਰਾ, ਹਰਿੰਦਰਪਾਲ ਸਿੰਘ ਸੱਤੂ ਅਤੇ ਭੋਲਾ ਮਹਿਰਾਜ ਨੇ ਕਿਹਾ ਕਿ ਉਹ ਪਾਰਟੀਬਾਜੀ ਤੋ ਉੱਪਰ ਉੱਠ ਕੇ ਯੂਨੀਅਨ ਦੀ ਬਿਹਤਰੀ ਲਈ ਬਣਦੀ ਮੱਦਦ ਨਵੇਂ ਬਣੇ ਪ੍ਰਬੰਧਕਾਂ ਦੇਣਗੇ ਤਾਂ ਜੋ ਅਪ੍ਰੇਟਰਾਂ ਦਾ ਕੰਮ ਸੰਚਾਰੂ ਢੰਗ ਨਾਲ ਚਲ ਸਕੇ। ਜਿਕਰਯੋਗ ਹੈ ਕਿ ਬੀਤੇ ਕੱਲ ਪ੍ਰਧਾਨ ਸਤਵਿੰਦਰ ਸਿੰਘ ਪੰਮਾਂ ਨੇ ਸਿਆਸੀ ਦਬਾਅ ਦੇ ਚਲਦਿਆਂ ਆਪਣੇ ਅਹੁਦੇ ਤੋ ਅਸਤੀਫਾ ਦੇ ਦਿੱਤਾ ਸੀ। ਜਿਸ ਤੋ ਬਾਅਦ ਪ੍ਰਧਾਨਗੀ ਪਦ ਲਈ ਕਈ ਨਾਵਾਂ ਦੀਆ ਚਰਚਾਵਾਂ ਨੇ ਜੋਰ ਫੜ ਲਿਆ ਸੀ। ਇਸ ਮੋਕੇ ਰੋਬੀ ਬਰਾੜ ਸਣੇ ਵੱਡੀ ਗਿਣਤੀ ਵਿਚ ਟਰੱਕ ਅਪ੍ਰੇਟਰ ਹਾਜਰ ਸਨ।