ਬਰਨਾਲਾ ਸਿਆਸਤ ਚ ਵੱਡਾ ਧਮਾਕਾ: ਗੁਰਦੀਪ ਬਾਠ ਦੀ `ਨੀਲੀ ਦਸਤਾਰ ਨੇ ਉਡਾਈ ਵਿਰੋਧੀਆਂ ਦੀ ਨੀਂਦ, ਕੀਤੂ ਦੇ ਕਿਲ੍ਹੇ ਨੂੰ ਖ਼ਤਰਾ?

ਬਰਨਾਲਾ ਸਿਆਸਤ ਚ ਵੱਡਾ ਧਮਾਕਾ: ਗੁਰਦੀਪ ਬਾਠ ਦੀ `ਨੀਲੀ ਦਸਤਾਰ ਨੇ ਉਡਾਈ ਵਿਰੋਧੀਆਂ ਦੀ ਨੀਂਦ, ਕੀਤੂ ਦੇ ਕਿਲ੍ਹੇ ਨੂੰ ਖ਼ਤਰਾ?
ਬਰਨਾਲਾ, 13 ਫਰਵਰੀ ((ਲੁਭਾਸ਼ ਸਿੰਗਲਾ )): ਪੰਜਾਬ ਵਿਧਾਨ ਸਭਾ ਚੋਣਾਂ-2027 ਅਜੇ ਦੂਰ ਹਨ। ਪਰ ਬਰਨਾਲਾ ਦੀ ਸਿਆਸੀ ਫ਼ਿਜ਼ਾ ’ਚ ਹੁਣ ਤੋਂ ਹੀ ਤਬਦੀਲੀ ਦੀਆਂ ਹਵਾਵਾਂ ਵਗਣੀਆਂ ਸ਼ੁਰੂ ਹੋ ਗਈਆਂ ਹਨ। ਸੂਬੇ ਦੀ ਸਿਆਸਤ ’ਚ ਅਕਾਲੀ-ਭਾਜਪਾ ਗਠਜੋੜ ਦੀਆਂ ਚਰਚਾਵਾਂ ਦੇ ਵਿਚਕਾਰ ਬਰਨਾਲਾ ਹਲਕੇ ’ਚ ਇਕ ਨਵਾਂ ਸਿਆਸੀ ਸਮੀਕਰਨ ਉੱਭਰ ਰਿਹਾ ਹੈ। ਆਮ ਆਦਮੀ ਪਾਰਟੀ ਤੋਂ ਬਾਗੀ ਹੋ ਕੇ ਜ਼ਿਮਨੀ ਚੋਣ ’ਚ ਧਮਾਲ ਮਚਾਉਣ ਵਾਲੇ ਗੁਰਦੀਪ ਸਿੰਘ ਬਾਠ ਦੀ ਬਦਲੀ ਹੋਈ ਦਿੱਖ ਤੇ ਨੀਲੀ ਦਸਤਾਰ ਨੇ ਸਿਆਸੀ ਗਲਿਆਰਿਆਂ ’ਚ ਨਵੀਂ ਚਰਚਾ ਛੇੜ ਦਿੱਤੀ ਹੈ। ਸ਼੍ਰੋਮਣੀ ਅਕਾਲੀ ਦਲ ਦੇ ਮੌਜੂਦਾ ਹਲਕਾ ਇੰਚਾਰਜ ਕੁਲਵੰਤ ਸਿੰਘ ਕੀਤੂ ਪਿਛਲੇ ਲੰਬੇ ਸਮੇਂ ਤੋਂ ਆਪਣੀ ਦਾਅਵੇਦਾਰੀ ਮਜ਼ਬੂਤ ਕਰਨ ਲਈ ਅੱਡੀ-ਚੋਟੀ ਦਾ ਜ਼ੋਰ ਲਗਾ ਰਹੇ ਹਨ। ਹਾਲ ਹੀ ’ਚ ਉਨ੍ਹਾਂ ਨੇ ਪਾਰਟੀ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੀ ਹਾਜ਼ਰੀ ’ਚ ਵਰਕਰਾਂ ਦਾ ਵੱਡਾ ਇਕੱਠ ਕਰਕੇ ਆਪਣਾ ਸ਼ਕਤੀ ਪ੍ਰਦਰਸ਼ਨ ਕੀਤਾ ਸੀ। ਹਾਲਾਂਕਿ ਸੁਖਬੀਰ ਬਾਦਲ ਵਲੋਂ ਦਿੱਤੇ ਇਕ ਬਿਆਨ ਨੇ ਕੀਤੂ ਖੇਮੇ ’ਚ ਹਲਚਲ ਪੈਦਾ ਕਰ ਦਿੱਤੀ ਹੈ। ਬਾਦਲ ਨੇ ਸੰਕੇਤ ਦਿੱਤਾ ਕਿ ਬਰਨਾਲਾ ’ਚ ਆਮ ਆਦਮੀ ਪਾਰਟੀ ਰੂਪੀ ਬਿਮਾਰੀ ਦੇ ਇਲਾਜ ਲਈ ਕਿਸੇ ਤਕੜੀ ਦਵਾਈ ਦੀ ਸਪਰੇਅ ਦੀ ਲੋੜ ਹੈ। ਰਾਜਨੀਤਿਕ ਮਾਹਿਰ ਇਸ ਤਕੜੀ ਦਵਾਈ ਨੂੰ ਗੁਰਦੀਪ ਸਿੰਘ ਬਾਠ ਦੇ ਰੂਪ ’ਚ ਦੇਖ ਰਹੇ ਹਨ।
---ਗੁਰਦੀਪ ਬਾਠ ਦੀ ਨੀਲੀ ਦਸਤਾਰ: ਸਿਰਫ਼ ਪਹਿਰਾਵਾ ਜਾਂ ਸਿਆਸੀ ਤਬਦੀਲੀ?
ਜ਼ਿਮਨੀ ਚੋਣਾਂ ਦੌਰਾਨ ਆਜ਼ਾਦ ਉਮੀਦਵਾਰ ਵਜੋਂ ਮੈਦਾਨ ’ਚ ਨਿੱਤਰੇ ਗੁਰਦੀਪ ਸਿੰਘ ਬਾਠ ਨੇ 18 ਹਜ਼ਾਰ ਤੋਂ ਵੱਧ ਵੋਟਾਂ ਹਾਸਲ ਕਰਕੇ ਸਾਰੀਆਂ ਰਵਾਇਤੀ ਪਾਰਟੀਆਂ ਨੂੰ ਹੈਰਾਨ ਕਰ ਦਿੱਤਾ ਸੀ। ਹੁਣ ਬਾਠ ਵਲੋਂ ਅਚਾਨਕ ਸਜਾਈ ਗਈ ਨੀਲੀ ਦਸਤਾਰ ਉਨ੍ਹਾਂ ਦੇ ਸ਼੍ਰੋਮਣੀ ਅਕਾਲੀ ਦਲ ’ਚ ਸ਼ਾਮਲ ਹੋਣ ਦੇ ਸਪੱਸ਼ਟ ਸੰਕੇਤ ਦੇ ਰਹੀ ਹੈ। ਉਨ੍ਹਾਂ ਦੀਆਂ ਵਰਕਰਾਂ ਨਾਲ ਵਧਦੀਆਂ ਮੁਲਾਕਾਤਾਂ ਤੇ ਅਕਾਲੀ ਰੰਗ ’ਚ ਰੰਗੇ ਜਾਣ ਦੀ ਪ੍ਰਕਿਰਿਆ ਨੇ ਇਹ ਸਾਬਿਤ ਕਰ ਦਿੱਤਾ ਹੈ ਕਿ ਉਹ 2027 ਦੀ ਸਿਆਸੀ ਲੜਾਈ ਲਈ ਪੂਰੀ ਤਰ੍ਹਾਂ ਤਿਆਰ ਹਨ।
---ਕੁਲਵੰਤ ਸਿੰਘ ਕੀਤੂ ਲਈ ਵਧੀ ਚੁਣੌਤੀ
ਗੁਰਦੀਪ ਬਾਠ ਦੀਆਂ ਸਰਗਰਮੀਆਂ ਨੇ ਸਾਬਕਾ ਵਿਧਾਇਕ ਮਲਕੀਤ ਸਿੰਘ ਕੀਤੂ ਦੇ ਪੁੱਤਰ ਕੁਲਵੰਤ ਸਿੰਘ ਕੀਤੂ ਲਈ ਮੁਸ਼ਕਲਾਂ ਖੜ੍ਹੀਆਂ ਕਰ ਦਿੱਤੀਆਂ ਹਨ। ਜਿਥੇ ਕੀਤੂ ਪਰਿਵਾਰ ਆਪਣੀ ਪੁਰਾਣੀ ਵਫ਼ਾਦਾਰੀ ਤੇ ਪਾਰਟੀ ਪ੍ਰਤੀ ਸੇਵਾਵਾਂ ਦੇ ਦਮ ਤੇ ਟਿਕਟ ਦੀ ਉਮੀਦ ਰੱਖ ਰਿਹਾ ਹੈ। ਉੱਥੇ ਹੀ ਬਾਠ ਦਾ ਵੋਟ ਬੈਂਕ ਤੇ ਨੌਜਵਾਨਾਂ ’ਚ ਉਨ੍ਹਾਂ ਦੀ ਪਕੜ ਪਾਰਟੀ ਹਾਈਕਮਾਂਡ ਨੂੰ ਮੁੜ ਵਿਚਾਰ ਕਰਨ ਲਈ ਮਜਬੂਰ ਕਰ ਸਕਦੀ ਹੈ। ਜੇਕਰ ਅਕਾਲੀ ਦਲ ਬਰਨਾਲਾ ’ਚ `ਜਿੱਤਣ ਵਾਲੇ ਉਮੀਦਵਾਰ ਦੇ ਫਾਰਮੂਲੇ `ਤੇ ਚੱਲਦਾ ਹੈ ਤਾਂ ਬਾਠ ਦੀ ਦਾਅਵੇਦਾਰੀ ਬੇਹੱਦ ਮਜ਼ਬੂਤ ਹੋ ਸਕਦੀ ਹੈ।
---ਅਕਾਲੀ-ਭਾਜਪਾ ਗਠਜੋੜ ਤੇ ਸੀਟਾਂ ਦਾ ਗਣਿਤ
ਸੂਬਾ ਪੱਧਰ `ਤੇ ਅਕਾਲੀ ਦਲ ਤੇ ਭਾਜਪਾ ਦੇ ਸੰਭਾਵੀ ਗਠਜੋੜ ਨੇ ਬਰਨਾਲਾ ਦੀ ਸਿਆਸਤ ਨੂੰ ਹੋਰ ਵੀ ਪੇਚੀਦਾ ਬਣਾ ਦਿੱਤਾ ਹੈ। ਜੇਕਰ ਗਠਜੋੜ ਹੁੰਦਾ ਹੈ ਤਾਂ ਬਰਨਾਲਾ ਸੀਟ ਕਿਸ ਦੇ ਹਿੱਸੇ ਆਵੇਗੀ। ਇਹ ਵੱਡਾ ਸਵਾਲ ਹੈ। ਪਰ ਮੌਜੂਦਾ ਹਾਲਾਤਾਂ ’ਚ ਗੁਰਦੀਪ ਸਿੰਘ ਬਾਠ ਦੀ ਨੀਲੀ ਦਸਤਾਰ ਨੇ ਇੰਨਾ ਜ਼ਰੂਰ ਸਾਫ਼ ਕਰ ਦਿੱਤਾ ਹੈ ਕਿ ਬਰਨਾਲਾ ਦੀ ਸਿਆਸਤ ਹੁਣ ਦੋ-ਪੱਖੀ ਨਹੀਂ। ਸਗੋਂ ਬਹੁ-ਪੱਖੀ ਤੇ ਦਿਲਚਸਪ ਹੋਣ ਜਾ ਰਹੀ ਹੈ।