ਵਿਧਾਇਕ ਲਾਭ ਸਿੰਘ ਉਗੋਕੇ ਦੇ ਯਤਨਾਂ ਸਦਕਾ ਭਦੌੜ ਦੀਆਂ ਸੜਕਾਂ ਦੀ ਨੁਹਾਰ ਬਦਲਣੀ ਸ਼ੁਰੂ: ਪ੍ਰਧਾਨ ਮਨੀਸ਼ ਗਰਗ

ਵਿਧਾਇਕ ਲਾਭ ਸਿੰਘ ਉਗੋਕੇ ਦੇ ਯਤਨਾਂ ਸਦਕਾ ਭਦੌੜ ਦੀਆਂ ਸੜਕਾਂ ਦੀ ਨੁਹਾਰ ਬਦਲਣੀ ਸ਼ੁਰੂ: ਪ੍ਰਧਾਨ ਮਨੀਸ਼ ਗਰਗ
ਭਦੌੜ, 21 ਮਾਰਚ, 7ਡੇਅ ਨਿੳਜ ਸਰਵਿਸ :: ਆਮ ਆਦਮੀ ਪਾਰਟੀ ਦੇ ਹਲਕਾ ਭਦੌੜ ਦੇ ਵਿਧਾਇਕ ਲਾਭ ਸਿੰਘ ਉੱਗੋਕੇ ਦੇ ਯਤਨਾਂ ਸਦਕਾ ਭਦੌੜ ਨੂੰ ਮਿਲੀਆਂ ਗਰਾਂਟਾਂ ਦੇ ਗੱਫਿਆਂ ’ਚੋਂ ਕਰੀਬ 6 ਕਰੋੜ ਰੁਪਏ ਭਦੌੜ ਦੀ ਨਗਰ ਕੌਂਸਲ ਖੇਤਰ ਅਧੀਨ ਆਉਂਦੀਆਂ ਸੜਕਾਂ ’ਤੇ ਲੱਗੇਗਾ। ਇਹ ਜਾਣਕਾਰੀ ਨਗਰ ਕੌਂਸਲ ਭਦੌੜ ਦੇ

ਪ੍ਰਧਾਨ ਮਨੀਸ਼ ਕੁਮਾਰ ਗਰਗ ਨੇ ਸਾਂਝੀ ਕਰਦਿਆਂ ਦੱਸਿਆ ਕਿ ਸੰਤ ਬਾਬਾ ਕਾਲ੍ਹਾ ਸਿੰਘ ਜੀ ਦੀ ਯਾਦ ’ਚ ਬਣਾਈ ਗਈ ਸੁੰਦਰ ਡਿਉਡੀ ਤੋਂ ਲੈ ਕੇ ਸ਼ਿਵ ਮੰਦਿਰ ਪੱਥਰਾਂ ਵਾਲੀ ਰੋਡ ਨੂੰ ਪੂਰਨ ਤੌਰ ’ਤੇ 20 ਫੁਟ ਚੌੜੀ ਕਰਨ ਦਾ ਕੰਮ ਪੂਰੇ ਜ਼ੋਰਾਂ ਤੇ ਚੱਲ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਰੋਡ ਪਹਿਲਾਂ ਸਿਰਫ ਨੌ ਫੁਟ ਚੌੜੀ ਹੀ ਸੀ ਤੇ ਲੰਿਕ ਰੋਡ ਹੋਣ ਕਰਕੇ ਆਉਣ ਜਾਣ ’ਚ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈਂਦਾ ਸੀ। ਇਥੇ ਇਹ ਵੀ ਜ਼ਿਕਰਯੋਗ ਹੈ ਕਿ ਇਸ ਰੋਡ ਉੱਪਰ ਕਈ ਧਾਰਮਿਕ ਅਸਥਾਨ ਵੀ ਸੁਸ਼ੋਭਿਤ ਹਨ। ਜਿਵੇਂ ਕਿ ਗੁਰਦੁਆਰਾ ਤਪ ਅਸਥਾਨ ਸੰਤ ਬਾਬਾ ਕਾਲ੍ਹਾ ਸਿੰਘ ਜੀ, ਸੰਤ ਬਾਬਾ ਮਲਕੀਤ ਸਿੰਘ ਜੀ, ਨਾਨਕਸਰ ਠਾਠ ਸੰਤ ਬਾਬਾ ਈਸ਼ਰ ਸਿੰਘ ਜੀ, ਪ੍ਰਾਚੀਨ 11 ਰੁਦਰ ਸ਼ਿਵ ਮੰਦਿਰ ਪੱਥਰਾਂ ਵਾਲੀ, ਜੈਨ ਸਮਾਧੀ, ਡੇਰਾ ਬਾਬਾ ਮੇਹਰ ਦਾਸ ਜੀ ਤੋਂ ਇਲਾਵਾ ਬਾਬਾ ਬਾਲਕ ਰਾਮ ਪ੍ਰਾਇਮਰੀ ਸਕੂਲ, ਮਾਤਾ ਗੁਜਰੀ ਪਬਲਿਕ ਸਕੂਲ, ਲਾਲਾ ਲਾਜਪਤ ਰਾਏ ਆਰੀਆ ਮਾਡਲ ਸਕੂਲ ਆਦਿ ਵੀ ਇਸ ਰੋਡ ਉੱਪਰ ਬਣੇ ਹੋਣ ਕਰਕੇ ਜਿਆਦਾਤਰ ਆਵਾਜਾਈ ਇਸ ਸੜਕ ’ਤੇ ਰਹਿੰਦੀ ਸੀ। ਹੁਣ ਇਹ ਸੜਕ ਦੇ 20 ਫੁਟ ਚੌੜਾ ਹੋਣ ਕਾਰਨ ਲੋਕਾਂ ਨੂੰ ਆਉਣ ਜਾਣ ’ਚ ਪਰੇਸ਼ਾਨੀ ਨਹੀਂ ਹੋਵੇਗੀ। ਪ੍ਰਧਾਨ ਮਨੀਸ਼ ਗਰਗ ਨੇ ਦੱਸਿਆ ਕਿ ਇਸ ਤੋਂ ਇਲਾਵਾ ਤਿੰਨ ਕੋਣੀ ਚੌਂਕ ਤੋਂ ਲੈ ਕੇ ਬੱਸ ਸਟੈਂਡ ਭਦੌੜ, ਨਗਰ ਕੌਂਸਲ ਚੌਂਕ, ਥਾਣਾ ਭਦੌੜ, ਤਹਿਸੀਲ ਰੋਡ, ਮੁਹੱਲਾ ਬੁੱਟਰਾਂ ਦਾ, ਤਲਵੰਡੀ ਰੋਡ, ਮੁਹੱਲਾ ਡਿੱਬੀਪੁਰਾ, ਮੁਹੱਲਾ ਜੰਗੀਕਾ, ਮੁਹੱਲਾ ਮਾਨਾਂ ਦਾ, ਮੁਹੱਲਾ ਵੱਡੇ ਕੌੜੇ ਤਕ ਸੜਕ ਦੁਬਾਰਾ ਨਵੀਂ ਬਣਾਈ ਜਾਵੇਗੀ। ਪ੍ਰਧਾਨ ਗਰਗ ਨੇ ਕਿਹਾ ਕਿ ਮਾਨਾ ਵਾਲਾ ਪ੍ਰਾਈਮਰੀ ਸਕੂਲ ਤੋਂ ਲੈ ਕੇ ਬਰਨਾਲਾ-ਬਾਜਾਖਾਨਾ ਮੇਨ ਸੜਕ ਤਕ ਰੋਡ ਨੂੰ ਦੁਬਾਰਾ ਬਣਾਇਆ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਖਹਿਰਾ ਪੈਲਿਸ ਰੋਡ ਦੀ ਹਾਲਤ ਜਿਆਦਾ ਖ਼ਸਤਾ ਹੋਣ ਕਾਰਨ ਇਸ ਰੋਡ ਉੱਪਰ ਇੰਟਰਲਾਕ ਟਾਇਲ ਲਗਾਉਣ ਦਾ ਕੰਮ ਵੀ ਜਲਦੀ ਸ਼ੁਰੂ ਕੀਤਾ ਜਾਵੇਗਾ ਤਾਂ ਕਿ ਭਦੌੜ ’ਚ ਪੁੱਜਣ ਵੇਲੇ ਕਿਸੇ ਨੂੰ ਕਿਸੇ ਵੀ ਪਰੇਸ਼ਾਨੀ ਦਾ ਸਾਹਮਣਾ ਨਾ ਕਰਨਾ ਪਵੇ। ਇਸ ਦੌਰਾਨ ਨਾਨਕਸਰ ਰੋਡ ਦੇ ਵਸਨੀਕ ਗੁਰਚਰਨ ਸਿੰਘ ਪਲਾਹਾ, ਡਾਕਟਰ ਅਮਰ ਸਿੰਘ, ਮੇਵਾ ਸਿੰਘ, ਸ਼ਮਸ਼ਾਨ ਘਾਟ ਕਮੇਟੀ ਅਗਰਵਾਲ, ਸ਼ਮਸ਼ਾਨਘਾਟ ਕਮੇਟੀ ਜੈਦ ਭੈਣੀ, ਗਿਆਰਾਂ ਰੁਦਰ ਸ਼ਿਵ ਮੰਦਿਰ ਪੱਥਰਾਂ ਵਾਲੀ ਕਮੇਟੀ ਦੇ ਪ੍ਰਧਾਨ ਹੀਰਾ ਲਾਲ ਸਿੰਗਲਾ, ਸ਼ੀਤਲ ਕੁਮਾਰ, ਸਾਬਕਾ ਕੌਂਸਲਰ ਤੇ ਆਰੀਆ ਮਾਡਲ ਸਕੂਲ ਭਦੌੜ ਦੇ ਪ੍ਰਧਾਨ ਭੂਸ਼ਣ ਕੁਮਾਰ ਸਿੰਗਲਾ, ਕਾਕਾ ਸਿੰਘ ਭਲੇਰੀਆ, ਸੇਵਕ ਸਿੰਘ ਭਲੇਰੀਆ, ਮੱਖਣ ਸਿੰਘ ਭਲੇਰੀਆ ਆਦਿ ਨੇ ਕਿਹਾ ਕਿ ਭਦੌੜ ਦਾ ਇਹ ਵਿਕਾਸ ਹੋਣਾ ਅਤਿ ਜਰੂਰੀ ਸੀ ਤੇ ਭਦੌੜ ਦੀਆਂ ਇਹ ਸੜਕਾਂ ਦੇ ਬਨਣ ਨਾਲ ਭਦੌੜ ਦੀ ਨੁਹਾਰ ਬਦਲ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਲੋਕਾਂ ਨੂੰ ਵਧੀਆ ਸੁਵਿਧਾਵਾਂ ਮਿਲਣ ਨਾਲ ਆਵਾਜਾਈ ’ਚ ਕੋਈ ਵਿਘਨ ਵੀ ਨਹੀਂ ਪਵੇਗਾ ਕਿਉਂਕਿ ਪਹਿਲਾਂ ਜਿਆਦਾਤਰ ਸੜਕਾਂ ’ਤੇ ਵੱਡੇ-ਵੱਡੇ ਟੋਏ ਪੈ ਚੁੱਕੇ ਸਨ ਤੇ ਕਿਸੇ ਸਮੇਂ ਕੋਈ ਵੀ ਭਿਆਨਕ ਹਾਦਸਾ ਵਾਪਰਨ ਦਾ ਡਰ ਬਣਿਆ ਰਹਿੰਦਾ ਸੀ। ਉਨ੍ਹਾਂ ਕਿਹਾ ਕਿ ਕਿਹਾ ਕਿ ਤਿੰਨ ਕੋਣੀ ਭਦੌੜ ਤੋਂ ਤਹਿਸੀਲ ਕੰਪਲੈਕਸ ਤਕ ਜਿਆਦਾ ਟਰੈਫਿਕ ਕਾਰਨ ਲੋਕਾਂ ਨੂੰ ਆਉਣ ਜਾਣ ’ਚ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਸੀ ਕਿਉਂਕਿ ਸੜਕ ’ਚ ਟੋਏ ਤੇ ਸੜਕ ਦੇ ਟੁੱਟਣ ਕਾਰਨ ਆਮ ਲੋਕਾਂ ਨੂੰ ਆਉਣ ਜਾਣ ’ਚ ਦਿੱਕਤ ਪੇਸ਼ ਆਉਂਦੀ ਸੀ। ਪਰ ਇਹ ਸੜਕਾਂ ਨਵੀਆਂ ਬਣਨ ਨਾਲ ਇਹ ਮੁਸ਼ਕਿਲਾਂ ਦਾ ਹੱਲ ਵੀ ਹੋ ਜਾਵੇਗਾ।