ਨਗਰ ਕੌਂਸਲ ਚੋਣਾਂ ਲਈ ਹਫ਼ਤਾ ਭਰ ਚੱਲੇ ਤਿੱਖੇ ਚੋਣ ਪ੍ਰਚਾਰ ਮਗਰੋਂ ਵੋਟਾਂ ਵਾਲੇ ਦਿਨ ਦੀ ਪਹਿਲੀ ਰਾਤ ਉਮੀਦਵਾਰਾਂ ਅਤੇ ਉਹਨਾਂ ਦੇ ਸਮਰਥਕਾਂ ਲਈ ਇਕ ਅਜਿਹੀ ਰਾਤ ਬਣੀ, ਜਿੱਥੇ ਥਕਾਵਟ, ਚਿੰਤਾ, ਉਮੀਦਾਂ ਅਤੇ ਚਰਚਾਵਾਂ ਸਭ ਕੁਝ ਇਕੱਠੇ ਨਜ਼ਰ ਆਇਆ। ਹਫਤੇ ਭਰ ਤੋਂ ਦੇਰ ਰਾਤ ਤੱਕ ਵੋਟਰਾਂ ਦੇ ਦਰਵਾਜ਼ਿਆਂ ‘ਤੇ ਜਾ ਕੇ “ ਧੂੜ ਫੱਕਣ” ਵਾਲੇ

ਚੋਣ ਪ੍ਰਚਾਰ ਦੀ ਥਕਾਵਟ ਮਗਰੋਂ ਉਮੀਦਵਾਰਾਂ ਨੇ ਲਿਆ ਸੁੱਖ ਦਾ ਸਾਹ

ਕਿਸੇ ਨੇ ਦਾਲ-ਰੋਟੀ ਤੇ ਦਰਦ ਨਿਵਾਰਕ ਨਾਲ ਲੱਭੀ ਰਾਹਤ, ਕਿਸੇ ਨੇ ਪੈੱਗਾਂ ਨਾਲ ਕੀਤੀ ਦਿਨ ਭਰ ਦੀ ਚਰਚਾ

ਤਪਾ ਮੰਡੀ, ਲੁਭਾਸ ਸਿੰਗਲਾ, ਵਿਸ਼ਵਜੀਤ ਸ਼ਰਮਾ, ਨਗਰ ਕੌਂਸਲ ਚੋਣਾਂ ਲਈ ਹਫ਼ਤਾ ਭਰ ਚੱਲੇ ਤਿੱਖੇ ਚੋਣ ਪ੍ਰਚਾਰ ਮਗਰੋਂ ਵੋਟਾਂ ਵਾਲੇ ਦਿਨ ਦੀ ਪਹਿਲੀ ਰਾਤ ਉਮੀਦਵਾਰਾਂ ਅਤੇ ਉਹਨਾਂ ਦੇ ਸਮਰਥਕਾਂ ਲਈ ਇਕ ਅਜਿਹੀ ਰਾਤ ਬਣੀ, ਜਿੱਥੇ ਥਕਾਵਟ, ਚਿੰਤਾ, ਉਮੀਦਾਂ ਅਤੇ ਚਰਚਾਵਾਂ ਸਭ ਕੁਝ ਇਕੱਠੇ ਨਜ਼ਰ ਆਇਆ। ਹਫਤੇ ਭਰ ਤੋਂ ਦੇਰ ਰਾਤ ਤੱਕ ਵੋਟਰਾਂ ਦੇ ਦਰਵਾਜ਼ਿਆਂ ‘ਤੇ ਜਾ ਕੇ “ ਧੂੜ ਫੱਕਣ”  ਵਾਲੇ ਉਮੀਦਵਾਰਾਂ ਨੇ ਆਖ਼ਿਰਕਾਰ ਰਾਤ ਨੂੰ ਕੁਝ ਸਮਾਂ ਆਪਣੇ ਪਰਿਵਾਰਾਂ ਅਤੇ ਨਜ਼ਦੀਕੀ ਸਾਥੀਆਂ ਨਾਲ ਬਿਤਾ ਕੇ ਸਰੀਰਕ ਤੇ ਮਾਨਸਿਕ ਥਕਾਵਟ ਦੂਰ ਕਰਨ ਦੀ ਕੋਸ਼ਿਸ਼ ਕੀਤੀ। ਖ਼ਾਸ ਕਰਕੇ ਔਰਤ ਉਮੀਦਵਾਰਾਂ ਦੀ ਗੱਲ ਕੀਤੀ ਜਾਵੇ ਤਾਂ ਉਹਨਾਂ ਨੇ ਆਖਿਰੀ ਦਿਨ ਤੱਕ ਘਰ-ਘਰ ਜਾ ਕੇ ਵੋਟਰਾਂ ਨਾਲ ਸੰਪਰਕ ਬਣਾਉਣ ਤੋਂ ਬਾਅਦ ਰਾਤ ਨੂੰ ਸਾਦੀ ਦਾਲ-ਰੋਟੀ ਖਾ ਕੇ ਸੁੱਖ ਦਾ ਸਾਹ ਲਿਆ। ਕਈ ਉਮੀਦਵਾਰਾਂ ਨੇ ਪੈਰਾਂ ਅਤੇ ਸਰੀਰ ਦੇ ਦਰਦ ਤੋਂ ਰਾਹਤ ਲਈ ਦਰਦ ਨਿਵਾਰਕ ਗੋਲੀਆਂ ਦਾ ਸਹਾਰਾ ਲਿਆ ਅਤੇ ਜਲਦੀ ਸੌਣ ਨੂੰ ਹੀ ਬਿਹਤਰ ਸਮਝਿਆ। ਪਰਿਵਾਰਕ ਮੈਂਬਰਾਂ ਨੇ ਵੀ ਉਨ੍ਹਾਂ ਦੀ ਸੇਵਾ ਵਿੱਚ ਕੋਈ ਕਸਰ ਨਹੀਂ ਛੱਡੀ ਅਤੇ ਘਰੇਲੂ ਮਾਹੌਲ ਵਿੱਚ ਥਕਾਵਟ ਦੂਰ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ। ਉਧਰ ਮਰਦ ਉਮੀਦਵਾਰਾਂ ਅਤੇ ਉਨ੍ਹਾਂ ਦੇ ਸਮਰਥਕਾਂ ਵਿੱਚ ਵੀ ਦਿਨ ਭਰ ਦੀ ਦੌੜ-ਭੱਜ ਤੋਂ ਬਾਅਦ ਥਕਾਵਟ ਸਾਫ਼ ਦਿਖਾਈ ਦਿੱਤੀ। ਕਈ ਥਾਵਾਂ ‘ਤੇ ਚੋਣ ਦਫ਼ਤਰਾਂ ਜਾਂ ਘਰਾਂ ਵਿੱਚ ਬੈਠ ਕੇ ਵੋਟਿੰਗ ਦੇ ਅੰਦਾਜ਼ੇ, ਜਿੱਤ-ਹਾਰ ਦੇ ਹਿਸਾਬ ਅਤੇ ਵੱਖ-ਵੱਖ ਵਾਰਡਾਂ ਦੀ ਸਥਿਤੀ ‘ਤੇ ਲੰਬੀਆਂ ਚਰਚਾਵਾਂ ਚੱਲਦੀਆਂ ਰਹੀਆਂ। ਪੈੱਗ ਦੇ ਸ਼ੌਕੀਨ ਕੁਝ ਉਮੀਦਵਾਰਾਂ ਅਤੇ ਉਹਨਾਂ ਦੇ ਕਰੀਬੀ ਸਮਰਥਕਾਂ ਨੇ ਚਾਰ ਪੈੱਗ ਲਾ ਕੇ ਚੋਣ ਮਾਹੌਲ ਦਾ ਵਿਸ਼ਲੇਸ਼ਣ ਕੀਤਾ ਅਤੇ ਫਿਰ ਅਗਲੇ ਦਿਨ ਦੀ ਰਣਨੀਤੀ ‘ਤੇ ਵੀ ਵਿਚਾਰ ਕੀਤਾ। ਚੋਣ ਮਾਹੌਲ ਕਾਰਨ ਸ਼ਹਿਰਾਂ ਅਤੇ ਕਸਬਿਆਂ ਵਿੱਚ ਦੇਰ ਰਾਤ ਤੱਕ ਹਲਚਲ ਬਣੀ ਰਹੀ। ਕਈ ਥਾਵਾਂ ‘ਤੇ ਸਮਰਥਕ ਜਿੱਤ ਦੇ ਦਾਅਵੇ ਕਰਦੇ ਨਜ਼ਰ ਆਏ, ਜਦਕਿ ਕੁਝ ਥਾਵਾਂ ‘ਤੇ ਉਮੀਦਵਾਰ ਚੁੱਪਚਾਪ ਆਪਣੇ ਨਤੀਜਿਆਂ ਦੀ ਉਡੀਕ ਵਿੱਚ ਦਿਖੇ। ਕੁੱਲ ਮਿਲਾ ਕੇ ਚੋਣਾਂ ਦੀ ਪਹਿਲੀ ਰਾਤ ਨੇ ਇਹ ਸਾਬਤ ਕਰ ਦਿੱਤਾ ਕਿ ਚੋਣ ਲੜਨਾ ਸਿਰਫ਼ ਰਾਜਨੀਤਿਕ ਮੁਕਾਬਲਾ ਹੀ ਨਹੀਂ, ਸਗੋਂ ਸਰੀਰਕ ਅਤੇ ਮਾਨਸਿਕ ਧੀਰਜ ਦੀ ਵੀ ਵੱਡੀ ਪਰੀਖਿਆ ਹੁੰਦੀ ਹੈ।