ਵੈਬਕੋ ਦੇ ਸਾਬਕਾ ਚੇਅਰਮੈਨ ਨੱਤ ਦੇ ਇਕਲੋਤੇ ਵਕੀਲ ਪੱਤਰ ਨੇ ਬਿਲਡਰ ਦੇ ਧੋਖੇ ਤੋਂ ਦੁਖੀ ਹੋਏ ਨੇ ਲਾਇਸੈਂਸੀ ਪਿਸਟਲ ਨਾਲ ਖੁਦ ਨੂੰ ਮਾਰੀ ਗੋਲੀ

ਵੈਬਕੋ ਦੇ ਸਾਬਕਾ ਚੇਅਰਮੈਨ ਨੱਤ ਦੇ ਇਕਲੋਤੇ ਵਕੀਲ ਪੱਤਰ ਨੇ ਬਿਲਡਰ ਦੇ ਧੋਖੇ ਤੋਂ ਦੁਖੀ ਹੋਏ ਨੇ ਲਾਇਸੈਂਸੀ ਪਿਸਟਲ ਨਾਲ ਖੁਦ ਨੂੰ ਮਾਰੀ ਗੋਲੀ
ਆਤਮਹੱਤਿਆ ਤੋਂ ਪਹਿਲਾਂ ਲਗਭਗ 8 ਮਿੰਟ 45 ਸਕਿੰਟ ਦਾ ਵੀਡੀਓ ਰਿਕਾਰਡ ਕੀਤਾ, ਇਕ ਪੰਨੇ ਦਾ ਸੁਸਾਇਡ ਨੋਟ ਵੀ ਛੱਡਿਆ
ਬਠਿੰਡਾ 30 ਮਾਰਚ (ਲੁਭਾਸ਼ ਸਿੰਗਲਾ/ਹਰਿੰਦਰ ਬੱਲੀ/ਗੁਰਪ੍ਰੀਤ ਸਿੰਘ) :- ਜਿਲ੍ਹੇ ਵਿਚ ਇਕ ਦਿਲ ਦਹਿਲਾ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ, ਜਿੱਥੇ ਕਾਂਗਰਸ ਦੇ ਸੀਨੀਅਰ ਆਗੂ ਅਤੇ ਵੈਬਕੋ ਦੇ ਸਾਬਕਾ ਚੇਅਰਮੈਨ ਸਵ. ਸੁਖਰਾਜ ਸਿੰਘ ਨੱਤ ਦੇ ਇਕਲੌਤੇ ਵਕੀਲ ਪੁੱਤਰ ਦਵਿੰਦਰ ਪਾਲ ਸਿੰਘ ਨੱਤ ਨੇ ਕਥਿਤ ਤੌਰ ‘ਤੇ ਆਪਣੀ ਲਾਇਸੈਂਸੀ ਪਿਸਤੌਲ ਨਾਲ ਖੁਦ ਨੂੰ ਗੋਲੀ ਮਾਰ ਕੇ ਆਤਮ ਹੱਤਿਆ ਕਰ ਲਈ। ਆਤਮ ਹੱਤਿਆ ਤੋਂ ਪਹਿਲਾਂ ਉਨ੍ਹਾਂ ਨੇ ਲਗਭਗ 8 ਮਿੰਟ 45 ਸਕਿੰਟ ਦਾ ਵੀਡੀਓ ਰਿਕਾਰਡ ਕੀਤਾ ਅਤੇ ਇਕ ਪੰਨੇ ਦਾ ਸੁਸਾਇਡ ਨੋਟ ਵੀ ਛੱਡਿਆ, ਜਿਸ ਵਿਚ ਉਨ੍ਹਾਂ ਨੇ ਮੋਹਾਲੀ-ਜੀਰਕਪੁਰ ਦੇ ਇਕ ਨਾਮੀ ਬਿਲਡਰ ਅਤੇ ਉਸਦੇ ਪਰਿਵਾਰ ਨੂੰ ਆਪਣੀ ਮੌਤ ਲਈ ਜੁੰਮੇਵਾਰ ਠਹਿਰਾਇਆ ਹੈ। ਘਟਨਾ ਦੀ ਸੂਚਨਾ ਮਿਲਦੇ ਹੀ ਥਾਣਾ ਕੈਨਾਲ ਕਾਲੋਨੀ ਅਤੇ ਵਰਧਮਾਨ ਪੁਲਿਸ ਚੌਕੀ ਦੀ ਟੀਮ ਮੌਕੇ ‘ਤੇ ਪਹੁੰਚ ਗਈ ਅਤੇ ਲਾਸ਼ ਨੂੰ ਕਬਜੇ ਵਿਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿੱਤਾ। ਪੁਲਿਸ ਨੇ ਮੌਕੇ ਤੋਂ ਖੁਦਕਸ਼ੀ ਨੋਟ ਅਤੇ ਵੀਡੀਓ ਕਬਜੇ ਵਿਚ ਲੈ ਕੇ ਜਾਂਚ ਸੁਰੂ ਕਰ ਦਿੱਤੀ ਹੈ। ਸੁਰੂਆਤੀ ਜਾਂਚ ਵਿਚ ਇਹ ਮਾਮਲਾ ਕਰੋੜਾਂ ਰੁਪਏ ਦੇ ਲੈਣ-ਦੇਣ ਅਤੇ ਕਥਿਤ ਧੋਖਾਧੜੀ ਨਾਲ ਜੁੜਿਆ ਦੱਸਿਆ ਜਾ ਰਿਹਾ ਹੈ। ਨੌਜਵਾਨ ਵੱਲੋਂ ਖੁਦਕੁਸ਼ੀ ਕੀਤੇ ਜਾਣ ਦੀ ਖਬਰ ਸੁਣ ਕੇ ਮੌੜ ਮੰਡੀ ਖੇਤਰ ਵਿਚ ਸੋਗ ਤੇ ਗੁੱਸੇ ਦੀ ਲਹਿਰ ਦੌੜ ਗਈ।

ਕਰੋੜਾਂ ਰੁਪਏ ਫਸਣ ਕਰਕੇ ਮਾਨਸਿਕ ਤਣਾਅ ਵਿਚ ਸੀ ਵਕੀਲ
ਮਿ੍ਰਤਕ ਵਕੀਲ ਦਵਿੰਦਰ ਨੱਤ ਨੇ ਆਪਣੇ ਵੀਡੀਓ ਅਤੇ ਸੁਸਾਇਡ ਨੋਟ ਵਿਚ ਖੁਲਾਸਾ ਕੀਤਾ ਕਿ ਮੋਹਾਲੀ-ਜੀਰਕਪੁਰ ਦੇ ਬਿਲਡਰ ਬਿੰਦਰਪਾਲ ਮਿੱਤਲ, ਉਸਦਾ ਪੁੱਤਰ ਪ੍ਰਤੀਕ ਮਿੱਤਲ ਅਤੇ ਭਰਤ ਮਿੱਤਲ ਨੇ ਉਨ੍ਹਾਂ ਤੋਂ ਵੱਡੀ ਰਕਮ ਲਈ ਸੀ, ਜਿਹੜੀ ਹੁਣ ਵਾਪਸ ਨਹੀਂ ਕੀਤੀ ਜਾ ਰਹੀ ਸੀ। ਉਨ੍ਹਾਂ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਦੇ ਆਪਣੇ ਲਗਭਗ ਸਾਢੇ 5 ਕਰੋੜ ਰੁਪਏ ਬਕਾਇਆ ਸਨ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਆਪਣੇ ਦੋਸਤਾਂ ਅਤੇ ਜਾਣ-ਪਛਾਣ ਵਾਲਿਆਂ ਤੋਂ ਵੀ 6-7 ਕਰੋੜ ਰੁਪਏ ਉਸ ਫਰਮ ਵਿਚ ਨਿਵੇਸ ਕਰਵਾਏ ਸਨ। ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀ ਵੀਡੀਓ ਵਿਚ ਉਨ੍ਹਾਂ ਨੇ ਕਿਹਾ, “ਮੇਰੇ ਨਾਲ ਬਹੁਤ ਵੱਡਾ ਧੋਖਾ ਹੋਇਆ ਹੈ। ਮੈਂ ਆਪਣੀ ਪੂਰੀ ਜਿੰਦਗੀ ਦੀ ਕਮਾਈ, ਪਿਤਾ ਦੀ ਜਮੀਨ ਵੇਚ ਕੇ ਆਏ ਪੈਸੇ, ਬੀਮੇ ਦੀ ਰਕਮ ਅਤੇ ਘਰ ਦੀ ਬਚਤ ਤਕ ਉਨ੍ਹਾਂ ਬਿਲਡਰਾਂ ਨੂੰ ਦੇ ਦਿੱਤੀ, ਪਰ ਹੁਣ ਉਹ ਪੈਸੇ ਵਾਪਸ ਕਰਨ ਤੋਂ ਮੁਕਰ ਰਹੇ ਹਨ ਜਦਕਿ ਉਸ ਨੇ ਆਪਣੇ ਖਾਤੇ ਰਾਹੀ ਵੀ ਕਰੋੜਾਂ ਰੁਪੈ ਦੀਆ ਐਂਟਰੀਆਂ ਇਧਰ ਉਧਰ ਕਰਨ ਦੀ ਗੱਲ ਆਖੀ ਹੈ, ਜੋ ਕਈ ਤਰ੍ਹਾਂ ਦੇ ਦੋ ਨੰਬਰੀ ਕੰਮਾਂ ਦੇ ਪਾਜ ਉਧੇੜੇਗੀ ਜਦਕਿ ਵੀਡੀਓ ਅਨੁਸਾਰ ਸ਼ਾਇਦ ਬਿਲਡਰ ਵੀ ਉਨ੍ਹਾਂ ਦੇ ਜੱਦੀ ਪਿੰਡ ਨੱਤ ਦੇ ਹੀ ਦੱਸੇ ਜਾ ਰਹੇ ਹਨ। ” ਆਰਥਿਕ ਦਬਾਅ ਕਾਰਨ ਉਹ ਗਹਿਰੇ ਮਾਨਸਿਕ ਤਣਾਅ ਵਿਚ ਸਨ। ਉਨ੍ਹਾਂ ‘ਤੇ ਐਸਬੀਆਈ ਬੈਂਕ ਦਾ ਲਗਭਗ 80 ਲੱਖ ਰੁਪਏ ਦਾ ਕਰਜਾ ਵੀ ਸੀ, ਜਿਸ ਨਾਲ ਉਨ੍ਹਾਂ ਦੀ ਪਰੇਸਾਨੀ ਹੋਰ ਵੱਧ ਗਈ ਸੀ।

ਨੇਤਾਵਾਂ ਅਤੇ ਮੰਤਰੀਆਂ ਕੋਲ ਵੀ ਲਗਾਈ ਗੁਹਾਰ, ਨਹੀਂ ਮਿਲਿਆ ਇਨਸਾਫ
ਵੀਡੀਓ ਵਿਚ ਦਵਿੰਦਰ ਨੱਤ ਨੇ ਕਿਹਾ ਕਿ ਉਨ੍ਹਾਂ ਨੇ ਇਨਸਾਫ ਲਈ ਕਈ ਨੇਤਾਵਾਂ ਅਤੇ ਮੰਤਰੀਆਂ ਦੇ ਦਰਵਾਜੇ ਖਟਖਟਾਏ। ਉਨ੍ਹਾਂ ਨੇ ਦੱਸਿਆ ਕਿ ਕੈਬਿਨਟ ਮੰਤਰੀ ਗੁਰਮੀਤ ਸਿੰਘ ਖੁੱਡੀਆਂ ਅਤੇ ਸਾਬਕਾ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਕੋਲ ਵੀ ਮੱਦਦ ਲਈ ਗੁਹਾਰ ਲਗਾਈ ਅਤੇ ਉਨ੍ਹਾਂ ਬਿਲਡਰ ਨੂੰ ਫੋਨ ਵੀ ਕੀਤਾ ਪਰ ਪਰ ਫਿਰ ਵੀ ਕੋਈ ਰਾਹਤ ਨਹੀਂ ਮਿਲੀ। ਉਨ੍ਹਾਂ ਨੇ ਕਿਹਾ ਕਿ ਹਰ ਸੰਭਵ ਕੋਸਿਸ ਕੀਤੀ, ਰਾਜਨੀਤਿਕ ਦਬਾਅ ਵੀ ਬਣਾਇਆ, ਪਰ ਕਿਤੇ ਵੀ ਇਨਸਾਫ ਨਹੀਂ ਮਿਲਿਆ। ਹੁਣ ਉਨ੍ਹਾਂ ਕੋਲ ਕੋਈ ਰਾਹ ਨਹੀਂ ਬਚਿਆ ਸੀ, ਜਿਸ ਕਾਰਨ ਉਸਨੇ ਆਤਮ ਹੱਤਿਆ ਦਾ ਕਦਮ ਚੁੱਕਿਆ।