ਤਪਾ ਚੋਣਾਂ ਦਾ ਵਾਰਡ ਨੰਬਰ 6: 'ਭੂਰੇ' ਰੂਪੀ ਰਿੱਛ ਦੀ ਜੱਫੀ ਅਤੇ ਬਿਨਾਂ ਸੁਰ-ਤਾਲ ਦੇ ਵੱਜਦੀਆਂ ਢੋਲਕੀਆਂ
ਸਿਆਸੀ ਜੰਗ ਵਿੱਚ ਤੋਪਾਂ ਦਾ ਰੁਖ਼: ਜਿੱਥੇ 'ਰਾਜੇ ਭੋਜ' ਨੂੰ ਨਕਾਰਨ ਵਾਲੇ ਹੁਣ 'ਫੱਤੂ ਤੇਲੀ' ਦੀ ਟੱਲੀ ਖੜਕਾਉਣ ਤੁਰੇ
7ਡੇਅ ਨਿਊਜ ਸਰਵਿਸ,
ਤਪਾ ਨਗਰ ਕੌਂਸਲ ਚੋਣਾਂ ਦੇ ਵਾਰਡ ਨੰਬਰ ਛੇ ਵਿੱਚ ਅੰਦਰਲੀ ਸਿਆਸੀ ਜੰਗ ਨੇ ਇਸ ਵਾਰ ਅਜਿਹਾ ਰੰਗ ਵੇਖਾਇਆ ਹੈ ਕਿ ਸਿਆਸਤ ਦੀਆਂ ਤੋਪਾਂ ਨੇ ਆਪਣਾ ਮੂੰਹ ਆਮ ਲੋਕਾਂ ਅਤੇ ਤਮਾਸ਼ਬੀਨਾਂ ਵੱਲ ਕਰ ਲਿਆ ਹੈ, ਜਿਸ ਕਾਰਨ ਵਾਰਡ ਅੰਦਰ ਟੀਡਿਆਂ ਨਾਲ ਢੋਲਕੀ ਵੱਜਣੀ ਸ਼ੁਰੂ ਹੋ ਗਈ ਹੈ। ਸਥਿਤੀ ਇਹ ਬਣ ਗਈ ਹੈ ਕਿ ਵਾਰਡ ਅੰਦਰ ਸਿਆਸੀ ਘਟਨਾ ਵਾਪਰਨ ਦੀ ਖ਼ਬਰ ਕੰਨੀਂ ਪੈਂਦਿਆਂ ਸਾਰ ਹੀ ਦਰਜਨ ਭਰ ਪਤੰਦਰ ਬਿਨਾਂ ਅੱਗਾ-ਪਿੱਛਾ ਸੋਚੇ ਤਹਿਸੀਲ ਵੱਲ ਨੂੰ ਭੱਜ ਨਿਕਲੇ; ਭਲਿਓ-ਮਾਣਸੋ ਕੋਈ ਪੁੱਛਣ ਵਾਲਾ ਹੋਵੇ ਕਿ ਜਿਸ ਕੰਮ ਦੀ ਤੁਹਾਨੂੰ ਨਾ ਸੁਰ ਦਾ ਪਤਾ ਹੈ ਅਤੇ ਨਾ ਹੀ ਤਾਲ ਦਾ, ਫਿਰ ਸੰਗੀਤ ਵਾਲਾ ਬਾਜਾ ਗਲ ਵਿੱਚ ਪਾਉਣ ਲਈ ਇੰਨੀ ਵੱਡੀ ਤਿਆਰੀ ਕਿਉਂ ਵਿੱਢ ਲਈ ਹੈ? ਇਹ ਉਹੀ ਸ਼ਹਿਰੀ ਹਨ ਜਿਨ੍ਹਾਂ ਨੇ ‘ਰਾਜੇ ਭੋਜ’ ਦੇ ਨਾਂ ’ਤੇ ਵੀ ਸਹਿਮਤੀ ਨਹੀਂ ਹੋਣ ਦਿੱਤੀ, ਤਾਂ ਭਲਾ ਹੁਣ ‘ਫੱਤੂ ਤੇਲੀ ਦੀ ਟੱਲੀ’ ਵਿੱਚ ਤੇਲ ਪਾਉਣ ਕੌਣ ਆਵੇਗਾ? ਨਤੀਜਾ ਇਹ ਹੈ ਕਿ ਚੋਣ ਮੈਦਾਨ ਵਿੱਚ ਨਾਮਜ਼ਦਗੀਆਂ ਭਰਨ ਤੋਂ ਬਾਅਦ ਹੁਣ ਅੱਧੇ ਤੋਂ ਜ਼ਿਆਦਾ ਉਮੀਦਵਾਰ ਆਪਣਾ ਪੈੜਾ ਛੁਡਾਉਣ ਨੂੰ ਫਿਰਦੇ ਹਨ ਅਤੇ ਜੇ ਉਹ ਸਿਆਣੇ ਹੋਏ ਤਾਂ ਵੇਲੇ ਸਿਰ ਪਤਲੀ ਗਲੀ ਵਿੱਚੋਂ ਨਿਕਲ ਆਉਣਗੇ, ਨਹੀਂ ਤਾਂ ਫਿਰ ਇਸ ਭੋਰੀਆਂ ਵਾਲੀ ਅੰਨ੍ਹੀ ਗਰਮੀ ਵਿੱਚ ਆਪਣੀ ਪਿੱਠ ’ਤੇ ਸਿਆਸੀ ਧੱਫੜ ਉਠਾ ਬਹਿਣਗੇ, ਪਰ ਹੱਥ ਪੱਲੇ ਕੀ ਪੈਣਾ ਹੈ, ਇਹ ਤਾਂ ਸਭ ਨੂੰ ਪਹਿਲਾਂ ਹੀ ਪਤਾ ਹੈ। ਰਹੀ ਗੱਲ ਕਿਸੇ ਇੱਕ ਦੇ ਜਿੱਤਣ ਦੀ, ਤਾਂ ਹਾਲਾਤ ਹੁਣ ਵੀ ਉਹੀ ਬਣ ਗਏ ਹਨ ਕਿ ਕਈ ਲੱਖੀ ਲੱਗਣਗੇ ਕਿਉਂਕਿ ਨਾਸਮਝੀ ਵਿੱਚ ਭਰੀਆਂ ਗਈਆਂ ਇਨ੍ਹਾਂ ਨਾਮਜ਼ਦਗੀਆਂ ਨੂੰ ਵੇਖ ਕੇ ਉਹ ਪੁਰਾਣੀ ਕਹਾਵਤ ਯਾਦ ਆ ਜਾਂਦੀ ਹੈ ਕਿ ਜਦੋਂ ਲੀੜੇ-ਲੱਤੇ ਦੀ ਥੁੜ ਹੁੰਦੀ ਸੀ, ਉਸ ਵੇਲੇ ਦੋ ਲੀੜਿਆਂ ਦੀ ਥੁੜ ਜਾਂ ਲਾਲਚ ਕਾਰਨ ਦੋ ਜਣੇ ਪਾਣੀ ਦੇ ਵਗਦੇ ਸੂਏ ਕੋਲ ਖੜ੍ਹੇ ਸਨ, ਤਾਂ ਅਚਾਨਕ ਹੀ ਪਾਣੀ ਵਿੱਚ ਤਰਦਾ ਆਉਂਦਾ ਇੱਕ ਭੂਰਾ (ਕੰਬਲ) ਵਿਖਾਈ ਦਿੱਤਾ, ਤਦ ਦੋਵਾਂ ਵਿੱਚੋਂ ਇੱਕ ਨੇ ਬਿਨਾਂ ਸੋਚੇ-ਸਮਝੇ ਹੀ ਸੂਏ ਵਿੱਚ ਛਾਲ ਮਾਰ ਦਿੱਤੀ ਅਤੇ ਭੱਜ ਕੇ ਉਸ ਭੂਰੇ ਨੂੰ ਹੱਥ ਪਾ ਲਿਆ; ਪਰ ਜਦੋਂ ਉਹ ਕੁਝ ਦੇਰ ਪਾਣੀ ਵਿੱਚੋਂ ਬਾਹਰ ਨਾ ਨਿਕਲਿਆ ਤਾਂ ਪੱਤਣ ’ਤੇ ਖੜ੍ਹੇ ਦੂਜੇ ਸਾਥੀ ਨੇ ਆਵਾਜ਼ ਮਾਰ ਕੇ ਕਿਹਾ ਕਿ ‘ਆਜਾ ਬਾਹਰ ਹੁਣ’, ਤਾਂ ਪਾਣੀ ਵਿੱਚ ਡੁੱਬਦਾ-ਤਰਦਾ ਬੋਲਿਆ, ‘ਹੁਣ ਭੂਰਾ ਨਹੀਂ ਛੱਡਦਾ’, ਕਿਉਂਕਿ ਉਹ ਕੋਈ ਨਿਰਜਿੰਦ ਭੂਰਾ ਨਹੀਂ ਬਲਕਿ ਕਾਲੇ ਰੰਗ ਦਾ ਰਿੱਛ ਸੀ! ਸੋ ਭਾਈ, ਇਹ ਚੋਣਾਂ ਵੀ ਬਿਲਕੁਲ ਉਸੇ ਰਿੱਛ ਵਾਂਗ ਹੁੰਦੀਆਂ ਹਨ, ਜਿਨ੍ਹਾਂ ਨੂੰ ਅਸੀਂ ਕਿਸੇ ਲਾਲਚ, ਮਜਬੂਰੀ ਜਾਂ ਥੁੜ ਕਾਰਨ ਫੜਨ ਲਈ ਜਾਂਦੇ ਹਾਂ, ਪਰ ਅੱਗੋਂ ਇਹ ਸਾਨੂੰ ਹੀ ਅਜਿਹੀ ਜੱਫੀ ਪਾ ਲੈਂਦੀਆਂ ਹਨ ਕਿ ਛੁੱਟਣਾ ਮੁਸ਼ਕਿਲ ਹੋ ਜਾਂਦਾ ਹੈ; ਹੁਣ ਵਾਰਡ ਖਾਲੀ ਜਾਂਦਾ ਸੀ, ਆਪਸੀ ਸਹਿਮਤੀ ਬਣਦੀ ਸੀ ਜਾਂ ਨਹੀਂ, ਇਹ ਵੱਖਰੀ ਗੱਲ ਸੀ, ਪਰ ਵਾਰਡ ਨੰਬਰ ਛੇ ਦੇ ਆਮ ਲੋਕਾਂ ਨੇ ਬਿਨਾਂ ਸੋਚੇ-ਸਮਝੇ ਇਸ ਭੂਰੇ ਰੂਪੀ ਚੋਣ-ਰਿੱਛ ਨੂੰ ਹੱਥ ਪਾ ਕੇ ਆਪਣੀ ਮੁਸੀਬਤ ਆਪ ਸਹੇੜ ਲਈ ਹੈ।